早前因為病的關係，所以好耐都未寫過 blog 喇！係我病緊期間，係旺角發生嘉禾大廈的五級大火，當中有兩位消防員殉職，我覺得他們行為真係好偉大呀！他們可以犧性自己的性命去延續他人的生命，呢個做法真係唔係咁多人可以做到，尤其是我地係一個咁現實世界裏，有很多很多人都祗係齋講，到真係發生事情時侯，通常呢 d 人都係第一個唔知跑去邊度？呢事件發生之後，我有一日搭小巴時，聽見電台播緊呢首「愛是不保留」歌，令到諗起呢兩位英雄人物事蹟，所以我特別想用呢首歌向他們作出致敬。

今日我要去做物理治療同去瑪麗覆診，我亞媽因驚我再係街度暈倒，所以佢今日全程同我一齊，真係辛苦佢喇！當我見到醫生時，我便問醫生點解又會有當日暈倒前感覺，醫生只係強調話唔關腦瘤問題，仲話係食得西藥多都會咁喎！唔...咁都好 d，我可能真係太虛弱！

今日，我去試禮服，其實我係十分唔鐘意著呢 d 衫！太煩喇！又要化粧、又要 set 頭、之前仲要做好多好多事前準備！何況我根本宜家都唔知幾時做手術，就算楝到都可能冇機會著喇！所以我十分之不願意去，而且我仲要睇郭晶晶跳水嫁嘛！幸好真係有件衫著到我幾好睇咋！我幾驚著到好似小露寶咁呀！因為我之前睇過其他 d 人，佢真係好似小露寶咁！仲有好似水魚呢 d 形容詞咁抵死！我係度笑到肚都痛埋。番到屋企己經係十點幾喇！仲要上網等人 send 番頭先試禮服 d 相畀我，傾傾電話陣，我突然間又頭暈同眼前一黑，感覺就係我兩個月前係街暈低一樣，我好驚呀！